काठमाडौं । सरकारले रोजगारीका क्रममा साउदी अरबको जेद्धामा पुगेर अलपत्र परेका जाजरकोटका आइस रानाको उपचार र उद्धारमा पहल थालेको छ । कोठमा गम्भीर अवस्थामा छटपटाइरहेका रानाको भिडियो सामाजिक सञ्जालमा व्यापक बनेपछि श्रम, रोजगार तथा सामाजिक सुरक्षामन्त्री कृष्णकुमार श्रेष्ठको निर्देशनमा सरकारी अधिकारीहरु उनको उद्धारमा जुटेका हुन् ।
राना पीडाले छटपटाइरहेको तस्वीर र भिडियो सार्वजनिक भएपछि आइतबार रियादस्थित नेपाली दूतावासका कर्मचारी र श्रम सहचारीसहितको टोली सो स्थानमा पुगेको थियो । टोलीले उनको स्वास्थ्यवस्थाबारे जानकारी लिएको श्रम मन्त्रालयले जनाएको छ ।
श्रम सहचारी प्रेम उपाध्याय र भाषा अनुवादकसहित दूतावासको टोलीले बिरामी रानालाई उपचारका लागि स्थानीय अस्पताल लगेको छ । दूतावासले रानासहित जेद्धामा अलपत्र परेका आठ नेपाली श्रमिकलाई दैनिक खानाको प्रवन्ध गर्दै आएको थियो ।
आठमध्ये एकजना नेपाल फर्किसकेका छन् । अन्य छ जना मंगलबार नेपाल फर्कनेछन् । रानाको पनि नेपाल फर्कने टिकटको व्यवस्था गरिए पनि उनको साउदी प्रहरीमा उजुरी रहेकाले केही समय लाग्ने दूतावसाले जनाएको छ । राना बिरामी परेपछि नेपाल फर्कने व्यवस्थाका लागि दूतावासले आइतबार नै अध्यागमन कार्यालयलाई पत्राचारसमेत गरेको थियो । उपचारपश्चात रानाको स्वास्थ्यवस्था सामान्य रहेको छ ।
