दाङ । यहाँको एक कृषि सहकारीले मेवाखेतीबाट राम्रो आम्दानी गर्दै आएको छ ।
घोराही उपमहानगरपालिका-४ गोग्लीमा रहेको बलिदान कृषि सहकारी संस्थाले मेवाका बिरुवा र फल बिक्री गरेर आम्दानीसँगै आफ्ना सदस्यलाई रोजगारी दिँदै आएको छ ।
सहकारीले नौ कट्ठा जग्गा भाडामा लिएर विगत तीन वर्षअघि देखि व्यावसायिक रुपमा रेड लेडी जातको मेवाखेती शुरु गरेका थिए । उक्त जग्गाको वार्षिक रु. ३६ हजार भाडा तिर्ने गरिएको सहकारीका व्यवस्थापक स्यानु चौधरीले बताए ।
सहकारीले हालसम्म मेवाका बिरुवा बिक्रीबाट रु. ५० हजार र पाकेको फल बिक्री गरेर रु. दुई लाख आम्दानी गर्न सफल भएको सहकारीका व्यवस्थापक चौधरीले बताए । मेवा बिक्रीबाट आएको मुनाफालाई शेयर सदस्यलाई दिने गरिएको उनी बताउँछन् ।
शुरुमा दस पोकाबाट मेवाका बिरुवा उत्पादन गरिएको थियो । त्यसमा दुई सय ५० बिरुवा सहकारीबाट लगाइएको उनको भनाइ छ । एक पोका बीउलाई रु. आठ हजार पाच सय पर्ने गरेको उनी बताउँछन् ।
प्रत्येक पोकाबाट चार सय बिरुवा उत्पादन हुने गरेको उनीसँग अनुभव रहेको छ । मेवाको बिरुवा पाँचभन्दा बढी लैजानेलाई रु. एक सयका दरले र त्योभन्दा कम लैजानलाई रु. एक सय ५० का दरले बिक्री गर्ने गरेको संस्थाका व्यवस्थापक चौधरीले बताए ।
मेवाको फल र बिरुवा पनि राम्रौ बिक्री हुने गरेको जानकारी दिंदै सहकारी संस्थामार्फत आम्दानी गर्न पाउँदा सबै शेयर सदस्य खुसी भएको उनले बताए ।
कुनै पनि आयआर्जन हुने काममा जोडिएपछि आम्दानी बढ्दै जाने उनको भनाइ छ । भोलिका दिन व्यवसायलाई अझ बढाउँदै लैजाने उनले बताए ।
यसअघि ‘रेमिट्यान्स’ सेवामार्फत आम्दानी गर्दै आएको सहकारीले नयाँ सहकारी ऐनमा कृषि सहकारीले उक्त सेवा सञ्चालन गर्न नपाउने भएपछि आम्दानीका अन्य उपाय खोज्न थालेका थिए ।
सोही क्रममा सहकारीले धान खरिद गरी चामल बिक्रीबाट पनि गत वर्ष रु. डेढ लाख आम्दानी गरेका थिए । तीन सय ५० सदस्य रहेको बलिदान कृषि सहकारीको रु. डेढ करोड पूँजी रहेको छ ।
