काठमाडौं । राष्ट्रिय समाचार समिति (रासस)को ६४औं वार्षिकोत्सवका अवसरमा आयोजित म्युजिकल चियर प्रतियोगितामा राससको पुस्तकालय शाखा प्रमुख शशीधर अधिकारी विजयी भएका छन् ।
नेपाल राष्ट्रिय कर्मचारी सङ्गठन, राससले सोमबार आयोजना गरेको सो प्रतियोगितामा सहभागी १५ जनालाई पराजित गर्दै उनी विजयी भएका हुन् ।
यस्तै हाँडी फुटाउने प्रतियोगितामा लेखा सहायक सीता अर्याल विजयी भएकी छिन् । प्रतियोगितामा विजयीलाई नेपाल राष्ट्रिय कर्मचारी सङ्गठन, राससका अध्यक्ष प्रेमप्रसाद उपाध्यायले पुरस्कार प्रदान गरे ।
राससको ६४औं वार्षिकोत्सवका अवसर पारेर सङ्गठनले आजै मैत्रीपूर्ण दौड प्रतियोगिता आयोजना गरेको थियो ।
उक्त प्रतियोगितामा पुरुषतर्फ सम्पादक हरि लामिछाने प्रथम, सम्पादन सहयोगी छविलाल कुमाल दोस्रो तथा महिलातर्फ समाचारदाता वुनु थारु चौधरी प्रथम र फोटो सम्पादक सीता भट्टराई दोस्रो भइन् ।
