गण्डकी । पोखरा सार्वजनिक पुस्तकालय पोखरा महानगरपालिका–९ पृथ्वीचोकमा नवनिर्मित ‘पोखरा घर’मा सरेको छ । यसअघि नयाँबजारस्थित क्षेत्री समाजको भवनबाट पुस्तकालय सञ्चालित थियो ।
तीन वर्षअघि महेन्द्रपुलमा रहेको पुरानो पुस्तकालय भवन हटाएर महानगरले झण्डा उद्यान बनाएपछि पुस्तकालयलाई अस्थायीरूपमा क्षेत्री समाज भवनमा सारिएको थियो ।
पोखराको चिनारी दिने गरी महानगरले बनाएको ‘पोखरा घर’बाट पुस्तकालय सेवा शुरु गरिएको पुस्तकालय सञ्चालक समितिका उपाध्यक्ष शिरोमणि बरालले बताए ।
पुस्तकालय सरेसँगै नयाँ भवनमा आन्तरिक सजावट र व्यवस्थापनका काम भइरहेको उनको भनाइ छ ।
पुस्तकालय सञ्चालनका लागि भवनको तला सँगै फर्निचरलगायतका सामग्री महानगरले उपलब्ध गराएको उपाध्यक्ष बरालले बताए ।
विक्रम संवत २०४९ मा स्थापना भएको यस पुस्तकालयमा विभिन्न विधाका १२ हजारभन्दा बढी पुस्तकहरू सङ्ग्रहित छन् ।
पोखरा महानगरपालिकासँगको सहकार्य र समन्वयमा पुस्तकालय थप व्यवस्थित र दिगो ढङ्गले सञ्चालन हुने बताइएको छ ।
“पोखरामा पठन संस्कृतिको विकासमा यो पुस्तकालयको ठूलो योगदान छ”, उपाध्यक्ष बरालले भने, “पुस्तकालयलाई प्रविधिमैत्री बनाउँदै समयानुकूल रूपान्तरणमा जोड दिन्छौँ ।”
विद्युतीय पुस्तकालयलाई पनि थप व्यवस्थित गरिने समितिले जनाएको छ । हालै निर्माण सम्पन्न भएको ‘पोखरा घर’को उद्घाटन हुन बाँकी छ ।
सोही घरमा आर्ट ग्यालरी, एकीकृत सूचना केन्द्र, कोशेली घर र पोखरा प्रज्ञा प्रतिष्ठानको कार्यालय रहने बताइएको छ ।
दुई वर्षअघि निर्माण थालिएको ‘पोखरा घर’लाई छिट्टै पूर्ण रूपमा सञ्चालनमा ल्याउने महानगरको तयारी छ ।
भूमिगत पार्किङसहितको ‘पोखरा घर’ पर्यटकका लागि आकर्षण बन्ने विश्वास लिइएको छ ।
रु. पाच करोड एक लाख ४६ हजारको लागतमा बनेको यस अपाङ्गमैत्री भवनमा विद्युतीय भर्याङ (लिफ्ट)को समेत सुविधा रहेको छ ।
‘पोखरा घर’लाई परम्परागत वास्तुकलासहित आधुनिक प्रविधि र सामग्रीको प्रयोग गरेर निर्माण गरिएको छ ।
