बागमती । साइक्लिङका माध्यमबाट स्वास्थ्य, पर्यावरण र पर्यटनमा जोड दिँदै आएको हिमालयन राइडर्स सोसाइटी हेटौँडाले मकवानपुर जिल्लाका विभिन्न तीनवटा गन्तव्यमा वृक्षरोपण गरेको छ ।
सोसाइटीले हरेक शनिबार साइक्लिङमार्फत गन्तव्य प्रवर्द्धनसँगै पर्यावरणीय सचेतना अभिवृद्धिका लागि विभिन्न गन्तव्यहरूमा वृक्षरोपण गर्दै आएको सोसाइटीका अध्यक्ष राजु थापा मगरले जानकारी दिए ।
यस हप्ता हेटौँडा उपमहानगरपालिका–१७ हर्नामाडीस्थित २००८ सालमा स्थापित बालबोध माध्यमिक विद्यालय परिसर, हेटौँडा–६ चौहडास्थित वंशगोपाल माध्यमिक विद्यालय परिसर र हेटौँडा–९ स्थित ऐतिहासिक एवम् धार्मिक गन्तव्य त्रिवेणीधाम परिसरमा तीन/तीन वटाका दरले एभोकाडोका बिरुवा लगाइएको उनले बताए ।
पर्यावरणीय सचेतना अभिवृद्धि गर्नु पनि आफूहरूको लक्ष्य भएको उल्लेख गर्दै उनले कार्यक्रमले समुदायमा सचेतना अभिवृद्धि भइरहेको बताए ।
वृक्षरोपण कार्यक्रमका लागि सोसाइटीका सदस्य यादव शर्मा ढकालले २५ वटा एभोकाडोका बिरुवा निःशुल्क उपलब्ध गराएको उनको भनाइ छ ।
यस संस्करणमा सोसाइटीको संयोजनमा ३० सदस्यीय टोलीले हेटौँडाबाट मकवानपुरको बकैया गाउँपालिका–३ हात्तीसुँडेसम्म करिब ८० किलोमिटर साइकल यात्रा गरेको जानकारी दिँदै उनले कार्यक्रमले हात्तीसुँडे क्षेत्रको पर्यटन प्रवर्द्धनमा योगदान पुगेको बताए ।
