कैलाली । नेपालको पहिलो चरा अभय आरण्य (वर्ड स्याङ्चुरी) घोडाघोडी सिमसार क्षेत्रमा हरिहाँसको सङ्ख्या बढेको छ ।
जैविक विविधताले महत्त्वपूर्ण मानिएको घोडाघोडीमा चरा संरक्षण नेटवर्क कैलालीको टोलीले पुस १९ गतेदेखि २१ गतेसम्म जलपन्छी गणना गरेको थियो ।
गणनाका क्रममा यस पटक घोडाघोडीको सूचक प्रजाति हरिहाँसको सङ्ख्या बढेको चरा संरक्षण नेटवर्कका सचिव रामकुमार चौधरीले जानकारी दिए ।
घोडाघोडी क्षेत्रमा जलपन्छीको गणना हिउँद र वर्षायाम गरी प्रत्येक वर्ष दुई पटक गरिँदै आइएको उनले बताए ।
सोही कार्यक्रमअनुसार यस वर्ष पनि जलपन्छी गणना सम्पन्न गरिएको हो । “सन् २०२२ मा हरिहाँस तीन सय ९४ वटा रहेकामा सन् २०२३ मा घटेर तीन सय १६ पुगेको थियो । सन् २०२४ मा यो सङ्ख्या चार सय ११, सन् २०२५ मा तीन सय ७२ रहेकामा यस वर्ष उक्त सङ्ख्या बढेर चार सय २९ पुगेको छ”, सचिव चौधरीले भने । उनका अनुसार यस वर्ष जलपन्छीको सङ्ख्या भने घटेको छ ।
सन् २०२२ मा एक हजार छ सय ८५ जलपन्छी गणना गरिएको थियो । सन् २०२३ मा एक हजार दुई सय २१, सन् २०२४ मा एक हजार चार सय ३७, सन् २०२५ मा एक हजार तीन सय १६ जलपन्छी गणना भएकामा यस वर्ष घटेर एक हजार एक सय ६८ मा सीमित भएको चरा संरक्षण नेटवर्कका अध्यक्ष दयाराम चौधरीले जानकारी दिए ।
नेपालमै सबैभन्दा बढी तालतलैया भएको जिल्लाका रूपमा कैलाली परिचित छ । त्यसमध्ये घोडाघोडी ताल नेपालको तराई क्षेत्रमा अवस्थित सबैभन्दा ठूलो प्राकृतिक ताल हो । घोडाघोडी ताल क्षेत्रमा घोडाघोडीसहित २४ वटा ताल छन् ।
घोडाघोडी र नकरोड ताल चराको बासस्थानका लागि सबैभन्दा उपयुक्त मानिने चरा संरक्षण नेटवर्कका अध्यक्ष चौधरीले बताए । उनका अनुसार घोडाघोडीसहित आसपासका क्षेत्रमा जलपन्छी गणना गरिएको हो ।
चौधरीका अनुसार घोडाघोडीमा पहिले दुई हजार दुई सयको हाराहारी जलपन्छी रहेकामा त्यो सङ्ख्या एक हजार एक सयमा समेटिएको छ ।
“बच्चा कोरल्न र हुर्काउनका लागि सुरक्षित स्थान मानिएको घोडाघोडीमा चराको बासस्थान असुरक्षित बन्दै जानु, आहारा घट्दै जानु, मौसम प्रतिकूल हुनुलगायत कारणले सङ्ख्या घट्दै गएको छ”, उनले भने ।
घोडाघोडी क्षेत्र रैथाने र आगन्तुक चराको महत्त्वपूर्ण बासस्थान भएकाले २०७८ फागुन २७ मा सुदूरपश्चिम प्रदेश सरकारले नेपालकै पहिलो ‘चरा अभय आरण्य’ (चराहरूको बासस्थान, प्रजनन र संरक्षणका लागि छुट्याइएको विशेष संरक्षित क्षेत्र) क्षेत्रका रूपमा घोषणा गरेको थियो । यहाँ तीन सय ८१ प्रजातिका चरा पाइन्छन् ।
