गुल्मी । गुल्मीमा मदन भण्डारी राजमार्ग योजना कार्यालयअन्तर्गत पश्चिमी क्षेत्रमा चार पक्की पुल निर्माणसँगै त्यस क्षेत्रका नागरिकलाई यतिबेला ठूलो खुसी मिलेको छ । यस पटकदेखि चाडबाडको समयमा खोला तरेर जोखिमपूर्ण यात्रा गर्नुपर्ने बाध्यता लामो समयको प्रतीक्षापछि सधैँका लागि टरेको छ ।
जिल्लाको इस्मा गाउँपालिका, धुर्कोट गाउँपालिका र मालिका गाउँपालिका क्षेत्रभित्र रहेका खोलामा चारवटा पक्की पुल निर्माण भएसँगै त्यस क्षेत्रमा नागरिक निकै खुसी बनेका छन् ।
दसैँ, तिहारजस्ता चाडबाडको समयमा घरमा आउँदा सधैँ खोला तर्नुपर्ने चिन्ताले पिरोलिरहने त्यस क्षेत्रका नागरिकले पुल बनेपछि सहज तरिकाबाट यात्रा गर्न पाएका छन् ।
उक्त क्षेत्रमा लामो समयको प्रयासपछि आर्थिक वर्ष २०८१/०८२ मा एकै पटक चार पक्की पुल निर्माण सम्पन्न भएर सञ्चालनमा आएका हुन् ।
सञ्चालनमा आएका पक्की पुलमा फूलबारी खोला, घमिर खोला, हुलाके खोला र धनार्जी खोला गरी चारवटा रहेका छन ।
निर्माण सम्पन्न गरिएका पुलमा फूलबारी खोलाको पुल रु. तीन करोड ३२ लाख ६८ हजार र घमिर खोला पुल रु. तीन करोड १३ लाख ८४ हजारमा निर्माण सम्पन्न गरिएको हो । उक्त पुल निर्माणको काम पन्थ निर्माण सेवाद्वारा गरिएको थियो ।
त्यसैगरी सुनिल समिर निर्माण सेवाद्वारा हुलाके खोला पुल रु. पाँच करोड ७९ लाख ५३ हजार र धनार्जी खोला पुल रु. सात करोड ४८ हजार लागतमा निर्माण सम्पन्न भएको मदनभण्डारी राजमार्ग योजना कार्यालयका ईन्जिनियर एवं सूचना अधिकारी होमनाथ पौडेलले जानकारी दिए ।
मदनभण्डारी राजमार्गअन्तर्गत तम्घास–सिमलटारी सडकखण्डमा खोलामा पक्की पुल नहुँदा वर्षातको समयमा त्यस क्षेत्रका नागरिकले ठूलो समस्या भोग्दै आएको स्थानीय कृष्णप्रसाद अर्यालले बताए ।
पुल नहुँदा वर्षौंदेखि खोलाको बीचबाट सवारीसाधन सञ्चालन गर्नुपर्ने बाध्यता थियो । वर्षातको समयमा बाढी आउँदा कतिपय सवारीसाधन खोला तर्ने क्रममा बीचैमा अड्किने र कतिपय समयमा बाढीले बगाउने जस्ता समस्या झेल्नुपर्ने अवस्था थियो । त्यसकारण यात्रुहरु वर्षौंदेखि आवत–जावत गर्न सास्ती व्यहोर्दै आएको थियो ।
पुल निर्माण नहुँदा उक्त क्षेत्रका राजनीतिक दल र नेतृत्वले समेत नागरिकबाट पटक-पटक ठूलै आलोचना खेप्नुपरेको थियो ।
अहिले चारवटा पक्की पुल एकैचोटी निर्माण सम्पन्न भएर सहजरुपमा सवारीसाधन सञ्चालन भएपछि त्यस क्षेत्रका नागरिक निकै खुसी बनेको इस्मा–१ गुरुवाका स्थानीय दधिराम पन्थीले बताए ।
उक्त पक्की पुल निर्माण भएपछि जिल्लाको पश्चिमी क्षेत्रका चार स्थानीय तहसँगै बागलुङ र प्यूठानसम्मका नागरिकलाई समेत सहज बनेको मालिका–६ का पूर्व वडाध्यक्ष शोभाखर गिरीले बताए ।
“पुल नहुँदा नागरिकले लामो समयदेखि पटक पटक समस्या र दुर्घटनाको जोखिम व्यहोर्दै आउनुपर्ने बाध्यताजस्तै बनेको थियो, अब खोलामा पक्की पुल बनेपछि विगतका समस्या समाधान गरिदियो, कालोपत्र सडकसँगै पुल निर्माण भएपछि यस क्षेत्रमा विकासले पनि नयाँ आयाम थप्ने भएको छ”, गिरीले भने ।
तम्घास–सिमलटारीखण्डमा सडक र पुल निर्माण भएपछि छल्दी पनाहा, झरना, हुलाके, धनार्जी, चौरासी, राङ्दल, फुलबारी, सिमलटारीलगायतका स्थानमा व्यापारिक चहल पहल बढ्न थालेको इस्मा–६ का अगुवा कृषक कृष्णप्रसाद घिमिरेले बताए ।
जिल्लाको आधाजसो जनसङ्ख्या ओगटेको पश्चिमी क्षेत्रमा पुल निर्माण भएसँगै त्यस क्षेत्रका नागरिकमा सहज यात्रासँगै थप खुसी पनि थपिएको छ ।
