काठमाडाैं । नेपाल भेटेरिनरी एसोसिएसनले बागमती प्रदेश लोकसेवा आयोगले पशु चिकित्सकतर्फको छैटौँ तहको पदपूर्तिका निम्ति एक तहमाथिको न्यूनतम शैक्षिक योग्यता राखी पशु चिकित्साशास्त्रमा स्नातकको उपाधि प्राप्त गरेको सूचना प्रकाशित गरेकामा विरोध जनाएको छ ।
आयोगले यही माघ १० गते प्रदेशका विभिन्न सातवटा स्थानीय तहमा स्थायी पदपूर्तिका लागि गरिएको पदपूर्तिको सूचनामा योग्यता बढाइएकामा एसोसिएसनले गुनासो गरेको छ । एसोसिएसनका अध्यक्ष शीतलकाजी श्रेष्ठले आज जारी गरेकाे विज्ञप्तिमा योग्यता सच्याउन आग्रह गरिएको छ ।
ती पदमा कम्तीमा सातौँ तह कायम गरी योग्यता सच्याउन सङ्गठनकाे आग्रह छ । स्थानीय तहहरूमा रहने कृषि सेवाको भेटेरिनरी समूहका पदहरू र कर्मचारी सख्या सङ्घीय मामिला तथा सामान्य प्रशासन मन्त्रालयबाट दरबन्दी तेरिजमा व्यवस्था भएकामा पशु चिकित्सकको दरबन्दी सातौँ र आठाैं हुने प्रस्टसँग उल्लेख रहेको स्पष्ट पारिएको छ ।
एसोसिएसनले गत वर्ष यसैगरी प्रकाशित विज्ञापनबारे २०७७ साल माघ १४ गते बागमती प्रदेश लोकसेवा आयोगमा अनुरोध गर्दै उक्त पदहरूलाई कम्तीमा सातौँ तह कायम गरी योग्यता सच्याउन अनुरोध गरिएको र सर्वाेच्च अदालतमा उक्त विषयकै मुद्दा विचाराधीन छ ।
