काठमाडौं । पोखराबाट जोमसोमको लागि उडेको तारा एयरको जहाज मुस्ताङको थासाङ गाउँपालिका–२ मा दुर्घटनाग्रस्त अवस्थामा फेला परेको छ । घटनास्थलमा प्रहरी पुगिसकेको छ । अहिले घटनास्थलमा मृतकको शव संकलनको काम भइरहेको छ ।
मृतकको शव पोष्टमार्टमका लागि काठमाडौं ल्याइँदै छ । मृतकका शव चिनिने अवस्थामा रहेको प्रहरीले जनाएको छ ।
१९ यात्रु र चालक दलका ३ सदस्यसहित आइतबार बिहान ९ः५५ बजे पोखराबाट जोमसोमका लागि उडेको तारा एयरको नाइन एन एइटी कलसाइनको जहाज १० बजेर ७ मिनेट जाँदा सम्पर्कविहीन भएको थियो ।
सम्पर्क विहीन जहाजको खोजीका लागि आइतबार नै सुरक्षाकर्मी पठाइएको भए पनि प्रतिकूल मौसमका कारण खोजी तथा उद्धार प्रभावित भएको थियो ।
आज बिहान मात्र दुर्घटनास्थल पत्ता लागेको थियो । मुस्ताङको थासाङ गाउँपालिका–२ सानुसरे डाँडाको १४ हजार ५०० फिट उचाइमा दुर्घटनाग्रस्त अवस्थामा जहाज फेला परेको थियो । दुृर्घटनामा परी जहाजमा सवार २२ जनाको ज्यान गएको छ ।
तस्वीर: सशस्त्र प्रहरी बल
