लाप्राक । नेकपा (एकीकृत समाजवादी)का अध्यक्ष माधवकुमार नेपालले आफ्नाे पार्टीले वृद्धवृद्धालाई भत्ता दिएकाे स्मरण गराउँदै आगामी निर्वाचनमा एकीकृत समाजवादीलाई विजयी गराउन आग्रह गरेका छन् । गाेरखाकाे लाप्राकमा शुक्रबार आयाेजित जनसभालाई सम्बाेधन गर्दै उनले आफ्नाे पार्टीका नेता मनमाेहन अधिकारी प्रधानमन्त्री र आफू उपप्रधानमन्त्री भएकाे सरकारले २०५१ सालमा ज्येष्ठ नागरिकलाई भत्ता दिने निर्णय गरेकाे बताए ।
“सारा देशले सम्झिरहेकाे छ, मनमाेहन अधिकारी प्रधानमन्त्री, म उपप्रधानमन्त्री, पार्टीका मुल नेता म यहीं आएकाे छु, तर जनताले बिर्सनु भएछ”, उनले भने, “हिजाे १०० रूपैयाँबाट शुरू गर्नुभयाे, अहिले ४ हजार रूपैयाँ छ, भाेलि ५ हजार पुर्याउने भनिएकामा धन्यवाद भन्नुपर्याे ।”
आफू उपप्रधानमन्त्री भएकाे साेही सरकारले नै देशभरका ४ हजार गाविस प्रत्येकलाई तीन लाखका दरले आफ्नाे गाउँ, आफैं बनाउ भन्ने नाराका साथ खर्च दिएकाे बताउँदै अध्यक्ष नेपालले अहिले साे रकम बढेर तीन कराेड पुगेकाे बताए । विकास निर्माणका स्थानीय सक्रिय हुनुपर्नेमा जाेड दिँदै उनले जनसहभागितासहितकाे विकासले मात्र समृद्धि हुने बताए ।
