कैलाली । यहाँको धनगढी उपमहानगरपालिका–७ देवरीयाका पाँच जनाको महिला समूहले दुनाटपरी बनाएर आत्मनिर्भर बनेका छन् ।
स्थानीय सीता चौधरी, कमला चौधरी, भुलिया चौधरी, विनिता रेग्मी र सविता चौधरीले दुई वर्षदेखि देवरियामा 'जाखौरबाबा महिला विकास दुनाटपरी उद्योग' सञ्चालन गर्दै आएका छन् । उनीहरुले शुरुमा वडा कार्यालयबाट दुनाटपरी बनाउने तालिम लिएका थिए ।
वडा कार्यालय र धनगढी उपमहानगरपालिकाले सो समूहलाई दुनाटपरी बनाउने दुईवटा मेसिन निःशुल्क उपलब्ध गराएको छ । मेसिनको प्रयोगले दुनाटपरी उत्पादन गर्न अझै सहज भएको छ ।
दुनाटपरी उद्योग सञ्चालकमध्येकी सिता चौधरीले वडाबाट प्राप्त दुनाटपरी बनाउने तालिमबाट आफूहरु आत्मनिर्भर बनेको बताए ।
उनले भने, “यसभन्दा पहिले हामी घरको काममा मात्र सीमित थियौँ । जब दुनाटपरी बनाउने तालिम लियौँ, त्यसपछि कमाइ राम्रै छ ।”
दिनमा एक हजार दुना र तीन सय जति टपरी उत्पादन गर्दै आएको उनले बताए । जसबाट मासिक रु. ३० हजार जतिको कारोबार हुने गरेको छ । दुना सानो साइजको रु. ७० पैसा, एक नम्बरको रु. ८० पैसा, दुई नम्बरको रु. एक, तीन नम्बरको डेढ रुपैयाँ र टपरी रु. साढे तीनमा बिक्री गर्ने गरेको उनले जानकारी दिइन ।
दुनाटपरी बिक्री गरी प्राप्त पैसा समूहमा जम्मा गर्ने गरेको अर्की सञ्चालक कमला चौधरीले बताइन । यसरी समूहमा जम्मा गरेको पैसाले आपतविपद्, गाह्रो, अप्ठ्यारो तथा घरायसी समस्या आइपरेको खण्डमा ठूलो समस्या टर्ने गरेको उनको भनाइ छ ।
दुनाटपरी कारोबारबाट दुई वर्षयता समूहमा बचत गरेको रु. ६० हजारका दरले एक जनाको भाग परेको उनले बताइन । “शुरुमा कामको खोजीमा थियौँ, के गर्ने, कसो गर्ने भन्ने अन्यौलमा थियौँ”, उनले भनिन, “जब वडाबाट तालिम लियौँ आफ्नो हातमा सिप भइसकेपछि हिजोआज ढुक्कले घर खर्च चलिरहेको छ ।”
शुरुशुरुमा दुनाटपरी बिक्रीका लागि समस्या हुने गरेता पनि हिजोआज समस्या नभएको समूहकी सविता चौधरीले बताइन ।
-----
