म्याग्दी । जिल्लाका नौ सयभन्दा बढी घरमा 'एक घर, एक धारा' सहितको खानेपानी सुविधा विस्तार भएको छ ।
खानेपानी वितरण गरेको डिभिजन प्रमुख झलकमोहन ओझाका अनुसार खानेपानी, जलस्रोत तथा सिँचाइ डिभिजन कार्यालयले आर्थिक वर्ष २०८१/०८२ मा सञ्चालन गरेका योजनाबाट नौ सय ३१ घरमा खानेपानीको पहुँच विस्तार भएको हो ।
एक हजार दुई सय ८३ वटा धारा निर्माण भएकामा नौ सय ३१ वटा धारामा मिटर जडान गरिएको छ ।
आयोजनामार्फत तीन हजार एक सय १९ मिटर मुख्य, एक सय छ किलोमिटर शाखा पाइपलाइन, चार हजार ७२ घनमिटर क्षमताका २२ वटा रिजर्भ ट्याङ्की र दुई सय ७७ वटा अन्य संरचना निर्माण भएका छन् ।
प्रदेश सरकारका ३६ वटा योजनाका लागि रु. छ करोड ९८ लाख २५ हजार बजेट विनियोजन भएकोमा ३५ वटा कार्यान्वयन र ९६ दशमलव ०९ प्रतिशत अथवा रु. छ करोड ७० लाख ९५ हजार खर्च भएको छ ।
सङ्घीय सरकारका पाँचवटा योजनाका लागि रु. ५१ लाख बजेट प्राप्त भएकोमा तीनवटा योजना कार्यान्वयन र रु. ४३ लाख ९५ हजार अथवा ८६.१९ प्रतिशत खर्च भएको कार्यालय प्रमुख ओझाले जानकारी दिए ।
यस वर्ष दोवा, हिस्तान औला, पुलाचौर, बरंजाको दह-खर्कमा एक घर, घर धारासहितको खानेपानी सुविधा विस्तार भएको छ ।
घराम्दी खानेपानी योजनाको औला स्किमको उपभोक्ता समितिका अध्यक्ष डिलप्रसाद फगामीले सबै उपभोक्ताको घर-घरमा मिटरसहितको धारा जडान गरेर खानेपानी वितरण गरिएको बताए ।
