नवलपरासी । पश्चिम नवलपरासीको प्रतापपुर गाउँपालिका–१ का भवानीशङ्कर यादवले व्यावसायिक माछापालन गरी वार्षिक रु. एक करोडभन्दा बढीको कारोबार गरिरहेको छ ।
भारतको आन्ध्र प्रदेशबाट माछापालनसम्बन्धी तालिममा हासिल गरेको अनुभवको प्रयोग गर्दै उनले माछापालन गरेर गाउँमै उदाहरण पेस गरेको छ ।
सोह्र बिघा जग्गामा वीस वटा पोखरी बनाएर व्यावसायिक माछापालन गरिरहेको ४८ वर्षीय यादवले बैखी कार्प माछा पालन गरेको छ ।
पोखरीमा रहेका माछालाई चरालगायत कुनै पनि चिजले खान नपाउन् भनेर जाल जाली लगाइएको छ ।
वैदेशिक रोजगारमा जानुभन्दा स्वदेशमै व्यवसाय गर्नुपर्छ भन्ने उद्देश्य बोकेर एकवा रिसर्च प्रा.लि. र अरुण एकीकृत कृषि फर्म दर्ता गरेर आफूले व्यावसायिक माछापालन गरेको र यसबाट वार्षिक रु. एक करोडभन्दा बढी कारोबार गरी राम्रो आम्दानी गरिरहेको बताए ।
पछिल्लो समय भारतबाट अवैध रूपमा माछा ल्याएर भारतीय व्यापारीले सीमा क्षेत्रमा प्रतिकिलो रु. एक सय ५० का दरले बिक्री गर्न थालेपछि भने समस्या भएको उनको भनाइ छ । यस वर्ष माछा उत्पादनसँगै बजारीकरणमा कुनै समस्या नभए लक्ष्यअनुसार नै कारोबार हुने यादवको अपेक्षा छ ।
माछापालन व्यवसाय सुरु गर्नुअघि उनले भैँसीपालन गरिरहेको थियो । उनीसँग ४० वटा भैँसी रहेका थिए । आफू किसानको छोरा भएकाले वैदेशिक रोजगारमा गएर मेहनत गर्नुभन्दा आफ्नै देशमा कृषि कर्म गरेर खानु राम्रो हुने भनेर यसैमा रमाइरहेको बताउने यादव पछिल्लो समय भने माछापालनमा जुटेको बताए ।
प्रतापपुर गाउँपालिका–१ का वडाध्यक्ष महेन्द्रबहादुर थारू चौधरीले वैदेशिक रोजगारमा जानुभन्दा स्वदेशमै व्यावसायिक काम गर्नु सराहनीय भएको बताए ।
पालिकाले पनि स्वरोजगारमूलक कार्यक्रम सञ्चालनका लागि पहल गरे पनि धेरैले चासो नदिने गरेको उनले सुनाए ।
भेटेरिनरी अस्पताल तथा पशु सेवा केन्द्रका प्रमुख श्रवण चौधरीले जिल्लामा नौ कट्ठाभन्दा बढी जग्गामा एक सय ४४ जनाले व्यावसायिकरूपमा माछापालन गरिरहेका जानकारी दिए ।
माछापालनमा राम्रो सम्भावना भएकाले यसतर्फ व्यावसायिक किसानहरूको आकर्षण बढिरहेको उनको भनाइ छ ।
