काठमाडौँ । राष्ट्रपति रामचन्द्र पौडेलले निर्माणाधीन काठमाडौँ–तराई/मधेस द्रूतमार्ग सडक आयोजनाअन्तर्गत विभिन्न स्थानहरूको आज हवाई तथा स्थलगत अवलोकन भ्रमण गरेका छन् ।
राष्ट्रपतिले आयोजनाको हालसम्मको प्रगतिका बारेमा जानकारी लिनुका साथै लेनडाँडा तथा धेद्रेमा निर्माणाधीन सुरुङ मार्ग, पुल तथा स्लोप प्रोटेक्सनका साथै आयोजनाको विभिन्न स्थानहरुको हवाई अवलोकन गरेको नेपाली सेनाले जनाएको छ ।
सो क्रममा प्रधान सेनापति अशोकराज सिग्देल, आयोजना प्रमुख, मध्य पृतनापति, मकवानपुरका प्रमुख जिल्ला अधिकारीलगायत उपस्थित थिए ।
विभिन्न १३ वटा प्याकेज रहेको द्रुतमार्ग सडक आयोजनाको हाल निर्माणाधीन १२ वटा प्याकेजअन्तर्गतका ७ वटा सुरुङमध्ये धेद्रे तथा लेनडाँडामा रहेका २ वटा सुरुङ छिचोलिई सकिएको छ ।
यस्तै महादेवटारस्थित सुरुङ मार्गको निर्माण कार्य ६५ प्रतिशत सम्पन्न हुनुका साथै चन्द्रामभिरस्थित सुरुङको निर्माण कार्य सुरु भएको छ र अन्य तीन वटा सुरुङहरूको डिजाइन तथा पूर्व तयारीको कार्य भइरहेको छ ।
उक्त आयोजनामा निर्माण गर्नुपर्ने ८९ वटा पुलमध्ये ८० वटा पुलको निर्माण कार्य भइरहेको छ । पाँच वटा पुल भने निर्माण सम्पन्न भइसकेको छ ।
साे सडक आयोजनाको हालसम्मको समष्टिगत भौतिक प्रगति ३७.६० प्रतिशत र वित्तीय प्रगति ३९.५६ प्रतिशत रहेको सैनिक जनसम्पर्क तथा सूचना निर्देशनालयले जनाएको छ ।
