म्याग्दी । धौलागिरि हिमशृङ्खलाको मानापाथी हिमालबाट साँझ हिउँपहिरो खसेको छ ।
मुस्ताङको थासाङ गाउँपालिका-२ स्थित मूलखर्कमा हिउँ पहिरो खसेको थियो । थासाङ गाउँपालिका-२ का वडाध्यक्षसमेत रहेका थासाङ गाउँकार्यपालिकाका प्रवत्ता गौतम शेरचनले हिउँपहिरोले बोक्सीखोला पूर्णरुपमा थुनिएको बताए ।
“यसअघिको पहिरो मूलखर्क क्षेत्रमा थुप्रिएको थियो, हिउँपहिरो बोक्सीखोलाको नजिकै धेरै तलसम्म आएको छ”, उनले भने, “हिउँपहिरोले बोक्सीखोला पूर्णरुपमा थुनिएकाले सतर्कता अपनाइएको छ ।”
बोक्सीखोला कालीगण्डकीको सहायक नदी हो । आसपासमा बस्ती नभए पनि बेनी-जोमसोम सडक बोक्सीखोलामा पर्दछ । यसअघि विसं २०७८ कात्तिक २८ र फागुन २१ गते थासाङ गाउँपालिका-२ कोवाङमा टुकुचे हिमालबाट आएको हिमपहिरोले एक सय ५० भन्दाबढी चौँरीगाई मरेका थिए ।
-----
