काठमाडौँ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनसङ्गीतज्ञ खुसीराम पाख्रिनका गीतसङ्गीतले आमनेपाली श्रमिकलाई उद्धेलित र सङ्गठित गर्न प्रेरित गर्दै आएको स्मरण गरेको छ ।
जेबी टुहुरे फाउन्डेसनले आयोजना गरेको कार्यक्रममा पाख्रिनलाई ‘जनगायक जेबी टुहुरे सम्मान–२०८१’ प्रदान गर्दै अध्यक्ष दाहालले राजनीतिक परिवर्तनमा पाख्रिनले गीतसङ्गीतका क्षेत्रबाट खेलेको भूमिका महत्वपूर्ण रहेको बताए ।
“हामीले दर्शन, सिद्धान्त र राजनीतिकका कुरा गरेर धेरै जनतालाई सङ्गठित गर्यौं भन्ने लाग्दैन, जति खुसीरामले देशभर र प्रवासमा गीत गाएर नेपाली श्रमिकलाई उद्धेलित बनाउथ्यो र सङ्गठित गर्न प्रेरित गथ्र्यो”, अध्यक्ष प्रचण्डले भने ।
पाख्रिनले आफैँ गीत रचना, सङ्गीत भर्ने, गाउने गरेको उल्लेख गर्दै अध्यक्ष दाहालले खुसीराम आफ्नो गाउँले साथीका रुपमा असाध्यै मिलनसार योद्धाका रुपमा रहेको बताए ।
अध्यक्ष दाहालले जनगायक जेबी टुहेरेले गीत सङ्गीतका माध्यमबाट देशभर जनतामा जागरण पैदा गर्न महत्वपूर्ण भूमिका खेलेको स्मरण गरे ।
“पञ्चायतकालमा टुहुरेका गीत जनतामा जाने मुख्य सामग्री हुन्थे । वैचारिक राजनीतिक रुपमा भन्दा पनि श्रमजीविका गीत गाएपछि जनतालाई आकर्षित गर्न सकिन्थ्यो”, उनले भने ।
नेकपा (एमाले) का उपाध्यक्ष गुरु बरालले जनगायकद्वय पाख्रिन र टुहुरे एकै सिक्काका दुई पाटाका रूपमा जीवनभर जनताको पक्षमा निरन्तर गीत संगीत गायन र सिर्जना गर्दै आएको स्मरण गरे ।
माओवादी केन्द्रका केन्द्रीय सदस्य पूर्णबहादुर घर्तीले जीवनभर जनताका गीत गाएर पाख्रिनले नेपालको राजनीतिक परिवर्तनमा महत्वपूर्ण योगदान दिएको बताए ।
सो अवसरमा जेबी टुहुरे फाउन्डेसनको वेबसाइट सार्वजनिक गरिएको थियो । कार्यक्रममा कलाकारहरुले जनगायक पाख्रिनले सिर्जना गरेको गीतसङ्गीत प्रस्तुत गरेको थियो ।
