काठमाडौँ । काठमाडौँ उपत्यकामा बस्ने थारू समुदायले गुरही-गुरिया पर्व मनाएका छन् । अग्रासन महिला समूहलगायत विभिन्न दुई दर्जन थारू सङ्घसंस्थाको आयोजनामा नेपाल प्रज्ञा प्रतिष्ठानमा भएको कार्यक्रममा रास्ट्रिय थारु आयोगका अध्यक्ष विष्णु चौधरीले शुभकामना दिए ।
उनले भने, “विगत केही वर्षयता थारू महिलाहरु सङ्गठित हुँदै गएकामा खुसी लागेको छ । महिलाहरुले यसलाई पर्व सँगसँगै अधिकार प्राप्तिको आन्दोलनका रुपमा पनि लिनुपर्छ ।”
थारू कल्याणकारिणी सभाकी केन्द्रीय सदस्य इन्दु थारूले गुरहीलगायत धेरै महत्वपूर्ण चाडबाडबारे अझै पनि राष्ट्रियस्तरको पाठ्यक्रममा समावेश नगरिनु विडम्वना भएकाे बताइन ।
कार्यक्रममा प्रेमा चौधरी, नेमसिंह थारूलगायतले राजधानी बसेर पनि गाउँघरको पर्व सामूहिकरुपमा मनाउन पाएकामा खुसी व्यक्त गरे ।
त्यस अवसरमा विभिन्न थारू कलाकारले गीत, नृत्य प्रस्तुत गरेका थिए । प्रज्ञा प्रतिष्ठानमा कपडाका गुरही (गुडिया) बालिकाले चौरमा सेलाएका थिए भने बालकहरुले सोंटा (कोर्रा)ले गुरही ठटाएका थिए ।
कार्यक्रममा काभा भलिबल प्रतियोगितामा उत्कृष्ट प्रस्तुति दिएकी सरस्वती चौधरी, भूटानमा सम्पन्न काभा विच भलिबल च्याम्पियनशीपमा स्वर्ण पदक विजेता मनिषा चौधरीलगायत महिला खेलाडीलाई सम्मान प्रदान गरिएको थियो ।
थारू बाहुल्यता रहेका तराईका जिल्लामा धान रोपिसकेपछि गुरही पर्व मनाउने चलन छ । खेतीपातीमा कुनै किसिमको हानि-नोक्सानी नहोस्, गाउँमा रोगविरोग नफैलियोस् भनेर किसानहरु हरेक वर्षको साउनको अन्तिम वा भदौको सुरुआतमा गुरही-गुरिया पर्व मनाउने गर्छन् ।
