मुस्ताङ । चालु आर्थिक वर्षको सात महिनामा तीन लाख २५ हजार पाच सय ५८ जना पर्यटक मुस्ताङ भित्रिएका छन् ।
जिल्ला प्रहरी कार्यालयका अनुसार चालु आ.व.को साउनदेखि माघसम्म विदेशी ६९ हजार आठ सय १४ र स्वदेशी दुई लाख ५२ हजार छ सय ६४ पर्यटक मुस्ताङ भित्रिएका हुन् ।
जिल्ला प्रहरी कार्यालयका अनुसार राष्ट्रिय गौरवको बेनी–जोमसोम सडकमार्ग हुँदै चालु वर्षको साउनमा १९ हजार सात सय ८१, भदौमा २३ हजार दुई सय पाच, असोजमा ७५ हजार पाच सय ९९, कात्तिकमा ८३ हजार सात सय ६६, मङ्सिरमा ४९ हजार ५०, पुसमा ३९ हजार एक सय ५३ र माघमा ३२ हजार चार जना विदेशी तथा स्वदेशी पर्यटक मुस्ताङ भित्रिएका हुन् ।
गत वर्षको साउनदेखि माघसम्म तीन लाख ४० हजार सात सय २९ विदेशी तथा स्वदेशी पर्यटकले मुस्ताङको भ्रमण गरेका थिए ।
प्रहरीको तथ्याङ्कअनुसार गत वर्षको आठ महिनाको तुलनामा चालु आ.व.को सोही अवधिमा १८ हजार एक सय ७१ जना (५.३३ प्रतिशत) पर्यटक कम भित्रिएका हुन् ।
जिल्ला प्रहरी कार्यालयका प्रहरी निरीक्षक नवराज न्यौपानेका अनुसार म्याग्दी र मुस्ताङको सिमाना घाँसामा सडकमार्ग हुँदै मुस्ताङ भित्रिने विदेशी तथा स्वदेशी पर्यटकको अभिलेख सङ्कलन गर्ने गरेको छ ।
पोखरा–जोमसोम हवाइ सेवामार्फत मुस्ताङ भित्रिएका र मनाङ हुँदै थोरङलापास गरी मुस्ताङ भित्रिएका पर्यटकको मातहतका प्रहरी एकाइहरूले अभिलेख सङ्कलन गर्ने गरेका छन् ।
मुस्ताङमा आ.व. २०८०/८१ मा चार लाख ५४ हजार तीन सय २६ जना र आ.व. २०८१/८२ मा सात लाख पाँच हजार सात सय ७९ जना स्वदेशी तथा विदेशी पर्यटक भित्रिएको जिल्ला प्रहरी कार्यालयको तथ्याङ्कमा उल्लेख छ ।
पछिल्लो समय राष्ट्रिय गौरवको (बेनी–जोमसोम–कोरला) सडक बर्सेनी सहज हुँदै जान थालेपछि मुस्ताङमा पर्यटकको आगमन दर वृद्धि हुँदै गएको हो ।
मुस्ताङमा भित्रिएका सार्क राष्ट्रका पर्यटकमध्ये अधिकांश भारतीय पर्यटकले मुक्तिनाथको दर्शन गरी फर्किने गरेका छन् । अन्य राष्ट्रका विदेशी पर्यटक भने बेनी–जोमसोम सडकमार्ग र मनाङ हुँदै थोरङ्लपास क्रस गरी मुस्ताङ भित्रिने गर्छन् ।
मुस्ताङको कागबेनीधाममा पितृ उद्धारका लागि श्राद्ध गर्न तथा मुक्तिनाथ मन्दिरको दर्शन गर्न आउने स्वदेशी पर्यटकको सङ्ख्या पनि बढ्दो छ ।
मुस्ताङ भित्रिएका पर्यटकमध्ये तीन प्रतिशत विदेशीले माथिल्लो मुस्ताङको भ्रमण गर्ने गरेका छन् ।
पछिल्लो समय जोमसोम–कोरला सडक सहज भएपछि उल्लेख्य सङ्ख्यमा स्वदेशी पर्यटक कोरलानाकासम्म पुग्ने गरेका पाइएको छ ।
