काठमाडौं । मुलुकभर प्रतिनिधिसभा र प्रदेशसभा सदस्य निर्वाचनका लागि भर्रखरैबाट मतदान शुरु भएको छ । बिहान ७ बजेदेखि मतदान कार्य प्रारम्भ भएको हो । मतदानका लागि मतदाताहरु बिहान सबेरैदेखि मतदान केन्द्रमा पुगिसकेका छन् ।
मतदान केन्द्रमा महिला मतदाताको सङ्ख्यासमेत उल्लेख्यरुपमा देखिएको छ । ज्येष्ठ नागरिक, अपाङ्गता भएका व्यक्ति तथा अशक्त र गर्भवतीलगायतलाई सहज मतदानका लागि प्राथमिकता दिने व्यवस्था गरिएको छ । मतदाताले प्रतिनिधिसभा र प्रदेशसभा सदस्यका लागि तयार गरिएको चार वटा बेग्लाबेग्लै मतपत्रमा स्वस्तिक छाप लगाई मतदान गर्नुपर्नेछ ।
एक करोड ७९ लाख ८८ हजार ५७० जनाको नाम मतदाता सूचीमा समावेश छ । निर्वाचनका लागि १० हजार ८९२ मतदानस्थलमा २२ हजार २२७ मतदान केन्द्र कायम गरिएको छ । मतदान अपराह्न ५ बजेसम्म चल्नेछ ।
